رد أحمد كابوريا، صانع ألعاب فريق الكرة بالنادي المصري البورسعيدي، على الإعلامي كريم حسن شحاتة، بعدما صرح بتوقيعه على عقود انتقاله لصفوف الزمالك.

وكتب كابوريا، عبر حسابه الشخصي على "فيس بوك": "بعد احترامي للإعلامي كريم حسن شحاتة، هو إمبارح طلع في البرنامج وقال إن أنا مضيت لنادي الزمالك والعقود معاه وهو مش عايز يطلعها احترامًا لجمهور بورسعيد".

وأضاف: "أولا إنت لو بتحترم مهنتك متقولش حاجة محصلتش وأنا بتحداك يا أستاذ كريم إنك تطلع العقود ولو إنت طلعت العقود أنا بقولك أهو قدام الناس كلها أنا لا هقعد في المصري ولا رايح حتة تانية أنا هبطل كورة خالص".

وتابع: "بس يبقى إيه العمل بقى لو إنت مطلعتش حاجة، أنا قولت إني هبطل كورة خالص يا ترى لو مفيش معاك عقود هتبطل إعلام ولا هتخلي الناس تشتمني علشان حاجه محصلتش وخلاص هيعدي الموضوع ؟".

وواصل صانع ألعاب المصري: "أنا عمري ما هعمل حاجة من وراء كابتن حسام وكابتن إبراهيم، اللي أنا جددتلهم على بياض اول السنة دي وأنا لسة ليا سنتين في النادي المصري، وأي انتقال لأي نادي في العالم مش هيتم إلا عن طريقهم وبموافقة كابتن حسام وكابتن إبراهيم وإدارة النادي المصري".