كشف باسم مرسي مهاجم الزمالك أسباب رحيله عن سموحة بعد أقل من أسبوع على انضمامه إلى صفوفه.

وكان الزمالك قد وافق على إعارة مهاجمه إلى سموحة خلال فترة الانتقالات الشتوية الجارية وحتى نهاية الموسم.

وقال باسم مرسي في تغريدات نشرها على موقع التواصل الاجتماعي "تويتر": "تلقيت اليوم اتصال من مسئول في نادي الزمالك يطالبنى بالرجوع، قال لي بالنص (عندي ليك مفاجأة، الزمالك عايزك ترجع وتروح نادي تاني بدل سموحة، إحنا إللي أخرنا البطاقة الدولية عشان لو كنت لعبت ماتش مكناش هنعرف نرجعك)".

وأضاف: "بسبب موضوع معين بقيت أنا طرف فيه بدون إرادتي، دلوقتى قدامي اختيار من اتنين الأول أن ألعب في الزمالك والمدرب مش عايزني بألف جنيه في ستة أشهر".

وواصل: "الاختيار التاني أن أنتقل لفريق ترتيبه الأخير في الدوري.. هل أنا بعد ما لعبت أربع مواسم في الزمالك، حصلنا فيهم على ٥ بطولات وأحرزت ٥٣ هدفًا، دا يكون مصيري من مسئولي نادي الزمالك؟!".

وأردف: "قبل كدة أنا مكنتش بطلع أتكلم، بس الموضوع يوصل إن يتقال إن التأخير بسببي في موضوع البطاقة الدولية وتشويه سمعتى وإن ده بسبب خلاف مادي بيني وبين النادى اليونانى فهذا غير صحيح".

وتابع: "أنا عقدي اتفسخ رسمي من الاتحاد اليوناني، لو مكنش اتفسخ رسمى مكنش يحق لي أن أتمرن مع سموحة".

واستأنف: "أنا في وقت إقامتي كاملة في اليونان، حصلت على ٥ آلاف يورو فقط وتنازلت عن جميع مستحقاتي للزمالك وجددت سنتين، تنازلت فيهما عن ٤ ملايين جنيه عشان يوافقوا على احترافي، وعند انتقالى إعارة لسموحة جددت سنة كمان على بياض".

واستكمل: "أنا هرجع نادي الزمالك مش لو بألف جنيه لو ببلاش لأنه شرف لي أن ألعب في الزمالك، مكنتش حابب إنى أتكلم رغم اتصال عدة برامج بي من وقت وصولي للقاهرة لتوضيح عدة أمور بمقابل مادي بس أنا كنت برفض".

وتابع: "أنا حالياً بعد ما استقريت فى الإسكندرية ونقلت أسرتي وأغراضي واستأجرت محل سكن، تم إبلاغي إنى لازم ألغي كل ده وأرجع حالاً يا أقعد ستة أشهر في البيت".

واختتم: "يارب الناس اللي كانت بتتهمنى إني مقصر طول الوقت وبعمل مشاكل تكون الصورة واضحة لهم، أنا طول الوقت بتحط في مشاكل أنا مش سبب فيها.. أسف على التطويل بس كان لازم التوضيح".